من فن الواو
أول كلامي بذكر الفرد
واحد ما تاني له دايم
بين لنا النفل والفرض
وف طاعته نجني الغنايم
ــــــــــــــــــــــــــــــــ
في المبتدا بذكر الله
هو خالقنا وناشينا
ومانحنا شمسه وضلاه
رازق راكبنا وماشينا
ـــــــــــــــــــــــــــــــــــــــــ
أمدح في سيرة نبي زين
داوى الغزاله وجارها
الدنيا خمر ونبيذ زين
تسكر إذا كنت جارها
ـــــــــــــــــــــــــــــــــــــــ
أول كلامي حصلي
ع اللي الغزاله مشتله
وأحكيله ع اللي حصلي
وأزرع همومي ف مشاتله
ـــــــــــــــــــــــــــــــــــــــــــــــــــ
بلاوي يا دنيا بلاوي
أنا عليا حكمت الأيام
ينام الليل أبو قلب خالي
عوال الهموم ما ينام
ـــــــــــــــــــــــــــــــــــــــــــ
همك يا دنيا شغلني
كمديون يسد المطالب
ناس حزينة وناس تغني
ومغلوب يضحك لغالب
ـــــــــــــــــــــــــــــــــــــــــــــــ
يا دنيا كم زاد عجبكي
عشنا وشفنا العجايب
خليتي الأصيل بيبكي
مسكين عدم الحبايب
ـــــــــــــــــــــــــــــــــــــــ
المولى سبحانه خلقها
تعب وهم ومشاكل
دايما تغير خلقها
وكل اللي فيها مشى كل
ــــــــــــــــــــــــــــــــــــــــــــ
ارمي حمولك على الله
خلق الخلايق وعالها
دنيا غرورة بلا جاه
والعاقل اللي وعى لها
ـــــــــــــــــــــــــــــــــــــــــــ
مين في همي بكى معاي
إذا بكيت أوعو تلوموني
بعد الأهل ما كانوا معاي
ساعة البلاوي فاتوني
ــــــــــــــــــــــــــــــــــــــــــــ
سنطة بلدنا عابوها
ولا حد نقى قرضها
فيه ناس بتبيع ابوها
علشان توصل غرضها
ــــــــــــــــــــــــــــــــــــــــــــ
فايته البنيه بخلخال
تخطر كما فرع مايل
عشق البنيه يا بو الخال
عامل ف قلبي عمايل
ـــــــــــــــــــــــــــــــــــــــــــــ
ليه يا زماني تاكلني
بعت العمامه والخليقه
أروح للوحوشه تاكلني
ولا لطعتي ع الخليقه
ــــــــــــــــــــــــــــــــــــ
تراهم الدراهم بتنفع
تجيب بل ويا غنيمه
الصاحب اللي ما ينفع
البعد عنه غنيمه
ـــــــــــــــــــــــــــــــــ
ورا الأيام قلبنا وعدلنا
الدموع ع الخد ساحت
لما قربنا ناخد عدلنا
لقينا الأيام ولت وراحت
ــــــــــــــــــــــــــــــــــــــــ
يا طبيبي ليا إلحق
وهات الدوا الموافق
ياما ناس بتعرف الحق
ولجل الضروره توافق
ـــــــــــــــــــــــــــــــــــــــ
الصاحب الزين يتحط ف الجيب
وتفج منه الروايح
الندل لما يبدي بالعيب
ما تيجي منه غير الفضايح
ــــــــــــــــــــــــــــــــــــــ
غلب اليوم زاد على العام
أقلب حمولي ومراضي
تقل سمعي وصابني العام
وكل وخصمه ماراضي
ـــــــــــــــــــــــــــــــــــــــــ
لو عطالي زماني بعدين
كنت أكيد للي كادولي
وخايف من الدهر بعدين
ليفرح ويشمت عذولي
مع تحياتي
الهوكي
