الاحراز

مصـــــر دايما بتلاغيك ...
قوم يا مصري ... مصر دايما بتلاغيك
شيل تراب او بيع كباب
او حمام محشي بفريك
المهم انك تقوم
ولا هتحايل عليك
مصر دايما بتلاغيك
لما بلدك يوم تعوزك
اوعى تمشي وتلوي بوزك
اصلي عارفك ، ايوه عارفك
لاوي عُرفك ليه يا ديك
مصر دايما بتلاغيك
مش مهم ان انت حافي
والحكومه يارب عافي
لو هشيلك فوق كتافي
اعمل الواجب عليك
مصر دايما بتلاغيك
شفت اخوك يوم لما راح
ماشي وف ايده السلاح
باع حياته عشان نعيش
مش عشان خاطر عنيك
مصر دايما بتلاغيك
بص دايما للأمام
ده انت طول عمرك همام
لو ظروفك مش تمام
منت برضو البركه فيك
مصر دايما بتلاغيك
وانت ياد يابو شكل عصري
في البطاقه الاسم مصري
ليه بشوفك امريكاني
شكلهم باهتين عليك
مصر دايما بتلاغيك
وانتي يام الصوت حنين
والقوام سايب ولين
الله يرحم دادي زينهم
مات ونفسه في جزمه شيك
مصر دايما بتلاغيك
وانت ابوك صاحب مصانع
بس ابنه يا عيني ضايع
كان بيحلم تبقى حاجه
ليه تخيب امله فيك
مصر دايما بتلاغيك
يابني قوم دي بلدنا جنه
بس هيا بتشتغلنا
لو مخفتش يوم عليها
يبقى عمرها متناديك
مصر دايما بتلاغيك .