فضاءات بئر النصر

بئر النصر

فضاء الموروث الثقافي الشعبي

العضو الأكثر فعالية على مستوى الـجماعة
حسن العرابي
مسجــل منــــذ: 2010-12-03
مجموع النقط: 534.61
إعلانات


هاينة والغول

هاينة والغول "قصة من الثرات المغربي"
بسم الله من تاني حكايتي بديت
بديتها بالصلاة على النبي العدنان محمد عليه الصلاة و السلام
اللي من الصلاة و السلام عليه ما مليت.
بلا شك حكاية مول الزين و الكلام الحلو سالات
و من البال سطورها تمحات
و اللواح اللي فيها تزمات مع واد الحكايات المنسية مشات
ومن وراها جات و مشات شلى هي من حكايات
من بين الحكايات اللي يامها تقادات
وكانو العجوزات الشارفات الهارفات
للصبيان الصغار يعاودوها ليهم في سكون الليل في الفراشات
حكاية هاينة و الغول
وشكون فينا اللي ما غمضو عينيه في صباه و صغرو حتى سمعها
ايوا نقولو بسم الله
حكاية هاينة و الغول احداثها كيف احداث حكاية مول الزين و اللسان الحلو بدات
وليني من غير صدفة و لا كذبات
من بعد ما طوّل قلب هاينة في السبات
الغول خلاه يحيى من بعد ما وقفو فيه الدقات
او زال طير النوم من عينيها و تمنات هاينة ولو ليلة وحدة فجنبو تبات
و شحال من ليلة جابتو مع نجوم الليل
غير هي و الشمعة تخايلو حداها
و شحال كملات بيه من ساعات
او ما كان يوقع بيناتهم لا شيطان و لا قلالين حسنات
ما يوقع بينهم لا خصام و لا هفوات
حيت قلب هاينة الصافي المسلم للغول سلم او كانت السماحة و السلم الخصلة الزينة اللي بيناتهم تشركات
هي من جيهتها ناحيتو ما قصرات
و حتى الغول ما كان يخسر ليها الخاطر بكلمة
و لا كان يبيتها بلا بيات
الغول عند هاينة زينة الوحوش
القلب الحنين الدافي
و العشق الصافي
و اللسان الحلو اللي ما يخرج من فمو حتى كلمة تحافي
مول الوجه المبشور اللي الضحكة طايلاه و ما مفارقاه
وخا الهموم عندو كتوزن بالقفافي
الليام بين هاينة و الغول طولات
او حسات هاينة بطولها
اوا كلها يلزم حدو
هاينة هاد المرة وقفات او سلمات
او قالت هدا جهدي
هاينة ما بقاتشي هاينة او مع الغول هاد المرة تصعبات
هي من ناحيتها ما فرطات
و الباقي من العمر معاه تبقى ما كرهات
او تشرك معاه اللي كان سوى الحلو او المرات
وليني من بعد ما الهدرة معاه ولفات
و التخمام فيه كترات
فكرات او عاود فكرات او خمات
و راه المتل يقول مية تخميمة او تخميمة ولا ضربة بالمقص
و قالت تخرج من قاع الواد قبل ما يحمل
و عاد نوليو فـ شد ليا نقطع ليك
ايوا بالقرار الحكيم تحزمات
و على الفراق و تشتات الشمل نوات و عولات
قبل ما يطيح الفاس في الراس و تولي محسوبة من النادمات
من بعد طول الفراق بالغول هي تلاقات
و القلب معاه قصحات
و قدامو حسكة وقفات و مع كتافو تقادات
و هدرت و دوات و قالت و نطقات
من اليوم العشرة اللي بيناتنا ما بقات
و ختماتها و قالت معرفة الرجال كنوز
و انا معرفتك يا الغول عمري عليها ما نندم
معاك الوقات الزينة دوزت
وليني دوام الحال من الموحال
و قلبك الى من قبلي عشق
انا مانتشرك فيه
راه الوجه المشروك عمرو ما يتغسل
و بالبكا و النواح على الغول سلمات
و مشات في طريقها طريق الغابة
و لراسها حنات
و هكدا حكاية هاينة و الغول سطورها في واد الحكايات المنسية مشات
و من واد لواد دفقات
و انا مع ولاد الجواد جلست
و تصنت لحكاية هاينة او الغول من فم العجوزات
و بلا زيادة ولا نقصان من فمي ليكم تعاودات.


تقييم:

7

0

مشاركة:

التعليق على الموضوع


لم يسجل بعد أي تعليق على هذه المشاركة !...

...........................................

=== إضافة تعليق جديد ===
الإسم:

نص التعليق:

انقل محتوى صويرة التحقق في الخانة أسفله:
الصورة غير ظاهرة