موروث شعبي
موروث شعبى
..................
اللي تقرضك ماتربيك .. ولا أتزيد في رفع شانك ..
وعلي درب لجواد خليك .. وصونهن جوارح ألسانك ..
وخذهن حجايج أمبكيك .. اللي ضحكك راه خانك ..
وتبع وصايا أموصيك .. وحط الوصا في أذهانك ..
اللي مو فرس بوك ترميك .. لو كنت ضامن أرهانك ..
والوقت بالقفى كيف يعطيك .. إيكيدك ويذبل غصانك ..
وعلي شي باطل إيداعيك .. إيذلك ويبطل إيمانك ..
ولاجاد روحك إينسيك .. وتنكر جمايل أعوانك ..
ولا كثرة المال تعميك .. وتطلق أصروعه حصانك ..
وكار الطمع شي يربيك .. وإيبين عوار أردحانك ..
لايجيبلك شيب يكسيك .. ولا إيكبرك دون وانك ..
ألا مطالبي ما إيهنيك .. وألا ظلم بن عم هانك ..
واللي إيبيع مايوم يشريك .. حتى أن كان رخصن
أثمانك ..
ألا النذل غدار يرخيك .. ويخونك لو كان صانك ..
المفروض لاتجيه لايجيك .. وعبره أيكون أمتحانك ..
كلام ألقدم كي الشيك .. وأصحى راك تهلب مكانك ..
والزعاليك يبقوا زعاليك .. هذي خلها في أعلانك ..
للسو عاشوا محاريك .. ماتحط فيهم أمانك ..
سوا أبهذي وألا بهاذيك .. إيديروك ظالم ومانك ..
كلام حق مافيه تشكيك .. وأنشد عليهم أعيانك ..
أن رافقت رافق أمباريك .. اللي يصبروا من أحزانك ..
اللي موش عالمطلب الديك .. مايذبحوهم أقرانك ..
وأن كان جيتم يكبروا بيك .. اللي يعرفوهن أوزانك ..
موش من ظهر صلب ولديك .. اللي مالدهر هم
أخوانك ..
مايطول عيبهم فيك .. ولا يوانسوا ظلم دانك ..
لجواد موش أجار تمليك .. رفقهم بطولة زمانك ..
أتجيك كان صادفت تكسيك .. يلي قليل أربحانك ..
لجواد ذكرهم ما إيواطيك .. ويزيدك كباره أمدحانك ..
وذكر القوي دوم يحميك .. ويبارك محاسن أحسانك ..
أمغير أطلبه الرزق ياتيك .. إيغيثن إيجودن أمزانك ..
كريم وجه وإيديه في أيديك .. خليك بيش تحفظ كيانك
..
والله رحيم مالذنب يعفيك .. أمغير توب طهر أبدانك ..
ومن شي لا شي أينجيك .. غني عالعمل سيسبانك
..
وأختامك أتجي خير ترضيك .. في يوم شيل جثماتك ..
توكل عليه نبيك .. وقول يااللــه غفرانك ..
