فضاءات بئر النصر

بئر النصر

فضاء الموروث الثقافي الشعبي

العضو الأكثر فعالية على مستوى الـجماعة
حسن العرابي
مسجــل منــــذ: 2010-12-03
مجموع النقط: 968.64
إعلانات


حكاية مي لعكوز مع العكار "بوبريص "

مي لعكوز والعكار

يحكى قديما أن مي لعكوز كانت عندها معزة كتحلبها وفي غفلة من مي لعكوز دخل العكار "بوبريص"(1) وأخذ حليبها وشربه .غضبت مي لعكوز لهذا وأخذت عصا وضربت العكار"بوبريص" فقطع ذيله فتوسل اليها ان ترد ذيله فقالت له سير حتى تجيب لي حليب ديالي.. مشى عند المعزة وقال لها امعيزة عطيني حليبة باش نعطيها لمي لعكوز ومي لعكوز باش تعطيني ذويلي راه اهلي رحلو بعدو عليا ..قالت له المعيزة سير حتى تجيب لي العرش من الشجرة ..مشى عند الشجرة وقال لها اشجرة عطيني عريش من عندك باش نعطيه لمعزة والمعزة تعطيني الحليب والحليب نعطيه لمي لعكوز ومي لعكوز تعطيني ذويلي راه اهلي رحلو بعدو عليا..قالت لو الشجرة سير حتى تجيب لي الماء من العين ..مشى عند العين ديال الماء وقال ليها اعطيني شويا ديال الماء باش نعطيه الى الشجرة والشجرة تعطيني العرش والعرش نعطيه الى المعزة والمعزة تعطيني الحليب والحليب نعطيه لمي لعكوز ومي لعكوز تعطيني ذويلي راه اهلي رحلو بعدو عليا..قالت له العين سير حتى تجيب ليا الصيادة يصيدو على الطيور .مشى عند الصيادة قالهم يا صيادة تعالو معايا صيدو على طيور العين باش العين تعطيني الماء والماء نعطيه الى الشجرة والشجرة تعطيني العرش والعرش نعطيه الى المعزة والمعزة تعطيني الحليب والحليب نعطيه الى مي لعكوز ومي لعكوز تعطيني ذويلي راه اهلي رحلو بعدو عليا..قالو ليه الصيادة سير حتى تجيب لينا الجرو ديال الصيد ..مشى عند الكلبة ديال الصيد وقال لها الكلبة عطيني الجرو ديالك باش نعطيه للصيادة والصيادة يصيدو على الطيور في العين والعين تعطيني الماء والماء نعطيه الى الشجرة والشجرة تعطيني العرش والعرش نعطيه الى المعزة والمعزة تعطيني الحليب والحليب نعطيه الى مي لعكوز ومي لعكوز تعطيني ذويلي راه اهلي رحلو بعدو عليا..قالت لو الكلبة سير حتى تجيب ليا السلاء(2) ديال العودة ...مشى عند العودة وقال ليها العودة عطيني السلاء ديالك باش نعطيه الى الكلبة والكلبة تعطيني الجرو والجرو نعطيه للصيادة والصيادة يصيدو على الطيور في العين والعين تعطيني الماء والماء نعطيه الى الشجرة والشجرة تعطيني العرش والعرش نعطيه الى المعزة والمعزة تعطيني الحليب والحليب نعطيه الى مي لعكوز ومي لعكوز تعطيني ذويلي راه اهلي رحلو بعدو عليا...قالت لو سير حتى تجيب ليا الغمار(3) من عند الحصادة ..مشى عند الحصادة وقالهم الحصادة عطيوني غمرة باش نديها العودة والعودة تعطيني السلاء والسلاء نعطيه الى الكلبة والكلبة تعطيني الجرو والجرو نعطيه للصيادة والصيادة يصيدو على الطيور في العين والعين تعطيني الماء والماء نعطيه الى الشجرة والشجرة تعطيني العرش والعرش نعطيه الى المعزة والمعزة تعطيني الحليب والحليب نعطيه الى مي لعكوز ومي لعكوز تعطيني ذويلي راه اهلي رحلو بعدو عليا ...قالو ليه الحصادة سير حتى تجيب لينا السيكوك من عند ديك الخيمة ..مشى عند موالين الخيمة وعيط ليهم حتى خرجو وقالهم عطيوني سيكوك باش نديه الى الحصادة والحصادة يعطيوني غمرة والغمرة نديها الى العودة والعودة تعطيني السلاء والسلاء نعطيه الى الكلبة والكلبة تعطيني الجرو والجرو نعطيه للصيادة والصيادة يصيدو على الطيور في العين والعين تعطيني الماء والماء نعطيه الى الشجرة والشجرة تعطيني العرش والعرش نعطيه الى المعزة والمعزة تعطيني الحليب والحليب نعطيه الى مي لعكوز ومي لعكوز تعطيني ذويلي راه اهلي رحلو بعدو عليا..اهل الخيمة رفضو يعطيوه السيكوك ..إختبأ وراء الجدران وبدأ يقول وااااعجولكم رضعو وااااااا وااااااولادكم تخاصمو ..خرجو يتجاراو ودخل الى الخيمة وسرق السيكوك والسيكوك عطاه الى الحصادة والحصادة عطاوه الغمرة والغمرة عطاها الى العودة والعودة عطاتو السلاء والسلاء عطاه الى الكلبة والكلبة عطاتو الجرو والجرو عطاه الى الصيادة والصيادة مشاو صيدو على الطيور لي في العين ديال الماء والعين عطاتو الماء والماء عطاه الى الشجرة والشجرة عطاتو العرش والعرش عطاه الى المعزة والمعزة عطاتو الحليب والحليب عطاه الى مي لعكوز ومي لعكوز رجعت لو ذويلو وهز رحيلو وتبع اهله .. ..وخريفتي مشات مع الواد الواد وانا بقيت مع الجواد .

شرح الكلمات :

(1)- العكار "بوبريص" : احدى السحليات
(2)- السلاء : هو الغشاء الذي يكون فيه المولود عندما يولد من البهائم
(3)- الغمرة : هي حزمة من القمح او الشعير

×××××


تقييم:

1

0
مشاركة:


التعليق على الموضوع


لم يسجل بعد أي تعليق على هذه المشاركة !...

...........................................

=== إضافة تعليق جديد ===
الإسم:

نص التعليق:

انقل محتوى صويرة التحقق في الخانة أسفله:
الصورة غير ظاهرة