بحبك يامصر .... يا بلدى
شيلى دموعك ضيئى شموعك.. مدى الخطوة تلاقى نهار.. شمس تاريخك عادت تانى.. قمرك لف الدنيا ودار.. مجدك أصبح تانى يغنى.. لما شبابك هب وثار.. ورد جناينك فتح عوده.. حطم كل سنين العار.. حطم كل قيود الباطل.. تلاتين حزن وفقر مرار.. كانت شلة لابسة قناع.. بايعة ضمير والنية دمار.. خنقوا الضحكة جوا حناجرك.. خلوا الحلم معاكى إنهار.. كانوا يقولوا دى أزهى عصورك.. وكرسى العرش وريث بقرار..
كل الصورة كانت رسم.. مخ العاقل جن وطار.. خلوا طيور العش تهاجر.. بسبب راقص أو طبال.. ترفع صوتك تبقى ضحية.. ألفين تهمة وسجن وتار.. لما الباطل عدى حدوده.. حاكم شعب بقيد من نار.. قوت أولادك كان منهوب.. رشوة فساد تعتيم أخبار.. هب شبابك من تحريرك.. قال هنصحح كل مسار.. جابلك شمسك بعد ما غابت.. كل رجولة وليها أسرار.. خلوا الدنيا تشهد تانى.. إن لمصر ولاد أحرار.. إنس جراح التلاتين حول.. يلا نكمل المشوار.. شيلى دموعك ضيئى شموعك.. مدى الخطوة تلاقى نهار.
