برطباط الجبل

(( زي ما هيَّــــــه )) !!!!!!!!!!!!!!!!
ــــــــــــــــــــــــــــــــــ
عصابة شقية ف قمح وسية
وبمنــاجلـها نازلـــة أذيَّــــة
تتار وكتار وف كذا ورديــة
بتحصد روحنا وملناش ديّة
عمدة عويل ملبوس ف عباية
... ملوهش مثيل ومفهش مزايا !!!
مولود ندل وناقصه ربايه
حاجة كئيــبة غريبــة غبــية
أمّا ( غفيره ) دا ليه موّال
عبد العمدة وعبد المال
ف سوق الناس ولا يسوي ريال
غفير شغال شيخ الحرامية
من بعضينا بيخوّفنا
بيغمينَّا ويشوّفنا !!!
بيكمِّمنا ويكتفنا
ويمَّشينا علي طراطيفنا
ويطرّينا وينشفنا
ويرّصصنا ويسّتفنا
ويكدبنا ويحلفنا !!!
وبيكشفنا تحت لحافنا
واجدع راجل فينا وليّه !!!
تلاتين سنة والنيل مسموم
بتشفط شهده حدادي وبوم
تلاتين سنة واولاد الشوم
كلاب بإنياب والعضمة طرية !!!
تلاتين سنة والحُزن اتحكّم
تلاتين سنة والفرح اتيَّتم
تلاتين سنة بنام وبنحلم
وبنتـنّـشَّـــق ع الحُــرية
تلاتين سنة والأعمي ساعاتي
تلاتين سنة ف الهوا بنهاتي
كــــل الرايـــح زي الآتــــي
والحدوتـــة زي ما هيَّــــــه !!!!
امتي يا مُرِّنا تبقي مسّكر ؟!
امتي ياحلم ياحلو تفسَّر ؟!
امتي ياكل الغايب تحضر ؟!
امتي نقول : وكسبنا قضية ؟؟؟!!!!!!!!!!!!!مشاهدة المزيد