عرب بخواج

ثورة فتحت عصر جديد.. قالت كلمة وفيها الرد.. لازم مصر تعيش نهضتها.. بإيد أولادها الحيل يتشد.. أولاد مصر يقودوا خطاها.. مهما ظروفنا كانت ع الكد.. خطوة جات والنية سليمة.. صنعها رجال بقيادة أسد.. قدت سفينتك والموج عالى.. وبكل عزيمة صنعت السد.. خدت قرار وربنا عانك. ورفضت لبنك تمد اليد.. والحلم العربى رجع من تانى.. وعُمر الحلم معانا ما اتهد.. وقلت قناتنا لازم تتأمم..
ورفعت شعار مش خايف حد.. خليت الطبقة الكادحة تعيش.. ومسحت دموع من فوق الخد.. وقلت مصانع لازم نبنى.. ونجنى ثمار إنتاجنا بجد.. تعليم مجانى صبح لفقير.. وقاعد أثره أديه ممتد.. خليت أفريقيا عاشت حرية.. وكنت بتبعت ليها المد.. ومصر هتفضل تاج الأمة.. مهما حاسد قلبه حقد.. والكل ف أزمة بيجرى عليها.. وقبل ما يطلب يلقى سند.. لو مالت مصر العالم يميل.. وخيرها على الدنيا ما يتعد.. لو واحد قالك مصر تراجعت.. أكيد مجنون وعقله شرد.. دا مصر الحضن الدافى للدنيا.. وكل تاريخنا يا سيدى يشهد.
راضى على أحمد حسين
سوهاج- طهطا- عرب بخواج
عضو نادى الأدب بطما