قوال
انا هقول وهفضل اقول
كلام انا بيه مبسوط
واللى يعارضنى فيه اكيد مخوت
هقول ليا ولبلدى ولولدى
وولدى من بعدى هيقول
اصل ابويا من قبلى قال
وجدى كان بيقول
وشاعر البتاع قال.......
مصر ولاده
طول مافيها الطلق والعاده
هتخلف شباب هيقول
وهيفضل يقول ويقول
هيقول لبكره وللأمل
هيقول للحلم اللى ممكن يكون
هيقول للظالم كفايه
ويقول للحاكم حاسب
قبل ماتحكم وتحاسب
*******
هقول وهقول وهفضل اقول
طول ما ايدى بتكتب
ولسانى بيقول
هقول كلام ماحد يقدر يقوله
غير اللى زيى او مسطول
******
لحكم العسكر هقول لأ
للأيد اللى تبطش وتكسر هقول لأ
للى يراقب قلم بيكتب هقول لأ
لكل فكر غربى هقول لأ
للي يظلم اخويا العربى هقول لأ
لليرسم حدود تفرق شعوب هقول لأ
لسلام مع صهيونى على حساب اللى جابونى هقول لأ
للى يسجنى ويرمينى
ويشتتلى فكرى ودينى
لليعاقبنى علشان بقول ويراقب العقول
لليحمى الحرامى ويطبق عالشريف القانون
للياكل مهلبيه وغيره يبات جعان محروم
أكيد أكيد هقول لأ لأ
*******
وهفضل اقول واقول
وياتوافقونى ف القواله
ياتحكموا علينا بالاباده
بتهمة القواله
لكن أكيد غيرى هيجى
ويكمل الكلام ويقول ويقول
لحدماتسترد العقول حياتها
وتتوحد بينا الشعوب
محمد رجب
