الاحراز

فجر الربيع ابتسم والزهر له نوح
والغصن الاخضر دبل ولا عادش يطوح
وكل عاشق بيمسك وردة ويلوح
سألت أهل الهوي ليه البكي والنوح
ردوا البلابل وقالو العندليب روح
مسكين يافن الطرب اخر نجومك غاب
ولاعادش يمشي سماك إلا بريق كداب
بعد الثلاثة اللي كانو أخلص الاحباب
الكوكب اللي احتجب والبلبل اللي راح
والعندليب اللي فاتنا وهو لسه شباب
كان الميعاد في الربيع والكل كان علي نار
متشوقين للنغم والفن ليل ونهار
ونسيو إن الزمن شايل معاه اسرار
وقالوا بكرة هنسمع اعذب الالحان
وقبل ما اللحن يكمل دابت الاوتار
كانت ليالي الربيع تحلي بتغريدة
وكان لما يسعد قلوبنا كان يبقي يوم عيدة
وكان بيضحك لنا ويداري تنهيدة
والجرح كان يؤلمة واحنا نقول الله
وكل زادة وزوادة عقود من الفل