قصيدة سيدي الرئيس
قصيدة ((سيدي الرئيس))
**********
سيدي الرئيس
أنا شمتان ف حضرتك
شمتان عشان مسيبتليش
حاجه بيها إني أرحمك
إني قلبي يرق ليك
إني أحس بدمعتك
ما انت ياما بكيت كتير
وان كنت ناسي ... أفكرك
وهتفتكر مين وألا مين
ملبوخ وإيه ملخبطك
هوة انت لسه شوفت حاجه
دا إحنا يادوب بندلعك
ما انت بأمانه دلعتنا
وطمر فينا ... تربيتك
وزي ما ف يوم لسعوتنا
محدش فينا هيلسوعك
زي ما ذليتنا وجوعتنا
محدش فينا هيجوعك
متخافش منا يا سيدي
محدش فينا هيضربك
وعشان غالي عندنا
محدش فينا هيلمسك
وهندوقك م الفول بتاعنا
وف سجن مكيف ... هنكيفك
هنظبطك ونظقططك
وعالشناكل ... مش هنشنكلك
ولامرة هتشوف الكرباج
ولا بالسلوك... هنكهربك
وهندوقك م النيل بتاعنا
عشان يظبط معدتك
مبسوط أكيد علي السرير
عسي الله يريح .. جتتك
لو ناقصك حاجه ...قول متخافش
أنا تحت أمرك ... وف خدمتك
وحشتني اخترناه اخترناه
ووحشني موووت ...منافقتك
وياريت مني متزعلش
عشان ثورتي ... قعدتك
وطربقت البيت عليك
وتعبتك ... وبهدلتك
معلش أنا قولت بكفاية
وشبعنا جدا من ... سحنتك
وأحب أقولك من ورا القضبان
أحب أقولك ف محنتك
وعالبلاطه
وباختصار
أنا شمتان ... ف حضرتك...
محمد محمود فايد
