امسك حرامى
إمسك حرامى إمسك حرامى إمسك حرامى
.........
بيضربى دايما أسفل حزامى
وضربه بيوجع مؤثر ودامى
ولا لاقي حد عنى يحامى
إمسك حرامي إمسك حرامي
.........
بيسرقني دايما فى صورة فاتورة
وحقه بياخده وفوق منه تورة
وله ذمة واسعة قايسها بمازورة
إمسك حرامي إمسك حرامي
.........
بيسرقنى دايما ويخرج لسانه
في كرسيه متبت ولازق مكانه
ويحلف يمين وعمره ما صانه
إمسك حرامى إمسك حرامى
.........
حرامي ارارى مصنف خطير
وعمره مايشبع وكرشه كبير
ويطلع يصرّح وعامل أمير
إمسك حرامي إمسك حرامي
..........
بيسرق فى عرقي ورزق عيالى
مقطع فى جلدي وجيبي اللى خالي
ولامرة حتى سايبنى في حالى
إمسك حرامي إمسك حرامي
.........
بيكسر لى ضهري ويلوي دراعي
ولا عنده قلب لبؤسي يراعي
ومن حضن بلدي يريد انتزاعي
إمسك حرامي إمسك حرامي
.........
بياكل فى لحمي وبيمص دمي
وكل اللى شاغله يزود في همي
وبلدى اللي أمه ماهى برضه أمي
إمسك حرامي إمسك حرامي
.........
بيسرق فى صوتى يسود يزور
ورايح لمجلس عنى يعبر
قرادة ولازقة ولن يتغير
إمسك حرامى إمسك حرامى
........
أبعد عنه لظلمه بظلمه يلاقيني
وأغمّض عنيه في نومي يجيني
وماعدت أملك سوى بس ديني
إمسك حرامي إمسك حرامي
.........
قوانينه واسعة و هفهافة
ويقول دى نزيهة وشفافة
وضميره محتاج لنضافة
إمسك حرامى إمسك حرامى
.........
حرامى يضحك ودمه خفيف
ولسة بيكدب وعامل شريف
وناقص يقول شاحت رغيف
إمسك حرامى إمسك حرامى
..........
إمسك حرامى محترم
ساكن فى قمة الهرم
بيقول تعالوا فتشونى
ماشيفشى جيبه اللى اتخرم
إمسك حرامى إمسك حرامى
......
لو كان عليا مش هسيبها و اهاجر
ولو كان معايا تمن التذاكر
بحبك يا بلدي والحب شاطر
إمسك حرامي إمسك حرامي
.........
مسكتك يالص وجبتك بايدى
ها تسمع أنينى ونبضة وريدى
ويوم ما هايرجع كل اللى راح
هارفع راياتى وأعلن عيدى
مسكت الحرامى مسكت الحرامى
