قصيدة حطه يابطه
حطه يابطه
حطه يابطه يادقن القطــــــه حسنى مبارك جاتله زوغوطه
أحمـــد عـــزوفتحى وصفوت لمـا شافونا جاتـــهـم نقطــــــــــــه
هتفــوا وزوروا فصلوا دولــه حالوا علينــــا ولاد الشرطــــــــه
يضربـــوا فينـــا وياخدوا ولادنا أمـــن الدولــه وقعوا فى ورطه
حطه يابطه يادقن القطـــــه حسنى مبارك جاتله زوغوطه
شوفتو الحزب الوطنى فى عيده نهبوا فلوسنا وعملــوا دعايـــــة
مؤتمرات فى قاعات وفى شاشه وعـــم نظيف فرشولنا ملايــــة
قعـــدوا يبخوا فى ســــم علينــــــا ويقولــوا إن بلدنا مرايـــــــــة
كــــــل الوزرا بتوعهم نسيــــوا إن الفقرا رفعـــــوا الرايــــــــة
حطه يابطــه يادقــن القطه حسنى مبارك جاتله زوغوطه
طلعــوا فى كــــل شاشاتنا ينافقوا لجــل يورثوا عــــم جمـــــال
قالوا عليه هو المستقبــــــل وهانعيــــــش عيشـــه عال العـــال
عــم سرور ومفيــــــد حلفولنــا هما وعــــم شريــف وهــــلال
إن الحزب الوطنى شعــــاره كـــــل يمينكوا هايبقى شمـــــــال
حطه يابطـــه يادقــن القطه حسنى مبارك جاتله زوغوطه
شوف الإنجاز يابنى بعينك شوف النهضه فى كــــل مكــــــان
تلقى بلدنا فســـاد وكوارث فى التعليـــم وفى صحه كمـــــــان
ولامدرســه ولا جامعــه بتنفــع ولاهندســه والطب اتهـــــان
والتربيــــة بتخـرج خوجــه محتاج روضــه عشان يتعــــان
حطه يابطه يادقن القطه حسنى مبارك جاتله زوغوطه
هو دا حالنا يابلدى ياغالية تلاتين سنه بنعيش فى جحيــــــم
ضحكوا علينا وقالوا هانعمل مصر بلدنا الغاليــــة نعيــــــم
خصخصوا فيها باعوها ياخويا وضربوا التربية والتعليـــم
كهربــوا كــــل حياتنا وخلوا كـــل جيوبنـــا ولا مليـــــــــم
حطه يابطه يادقن القطه حسنى مبارك جاتله زوغوطه
مش عاوزين يسيبوها ويخفوا ولا عاوزين يسيبونا نصلـح
خلوا الشعب فى غزه يعانـــى والصهيونـــى خلوه يفـــرح
ياعواجيــز البلــد انكسفوا غوروا فى داهيــه وخلونا نفلـح
حتى الزرع فى أرضنا ولــع من أشكالكو ماعدش بيطرح
حطه يابطه يادقن القطه حسنى مبارك جاتله زوغوطه
نفسى ياشعب بلدنا تصحصــح لجل حقوقك ترجـــع تانــى
قوم ياشبابنـــا بلدنا بتصرخ إوعى تكون فى حياتنا أنانــى
علشان تاخـــد كــل حقوقــــك إرفع راســــك ياإخوانــــى
ياربنا إصلح أحوالهــم علشـــان يرفعـــــوا راس أوطانـى
حطه يابطه يادقن القطه حسنى مبارك جاتله زوغوطه
إصحى ياشعب بلدنا اتسرقت فاضل إيه علشان تتحرك
لساك نايم قوم من نومك علشان تلحق حاجه من بلدك
الملاعين نهبوها وسرقوا أرضك زرعك شمسك ظلك
أحمد عز وحزب وطنطن وانت ياعم جمال هانحاكمك
حطه يابطه
مصر ياغاليه ياأم الدنيا يالا انتفضى كفاية حرام
كل بلاد العرب انتفضت شفتى التونسى صحصح قام
كل تاريخك حره أبيه دوسى ياغاليه عالظلام
اللى سقوكى المر يابلدى كل تاريخهم كان أوهام
حطه يابطه
آه ياسمره يابهيه ياللى حطمتى الأساور
ياللى عديتى بشبابك اللى عايش عمره صابر
شلتى روحك وسط كفك لجل ماتزول الأكاسر
تونس الخضرا ياغالية رجعت علما ومنابر
حطه يابطه
قامت الحره فى ليله تمحى كل عميل وظالم
من سنين خلاها ضلمه داس وحارب كل عالم
خلى كل الشرفا هربت شرد الشعب اللى قاوم
واما قام الشعب يصرخ خرب الدور والمعالم
حطه يابطه
تونس الخضرا ياغاليه ياللى أولادك نشامى
خلصوكى ياغاليه ماللى خلى أولادك يتامى
ماللى باعك واللى خانك ياما باع دينه وياما
سمى نفسه زين وعابد آه ياويله يوم القيامه
حطه يابطه
عم بيرم قالها كلمه لازم الأحرار تسود
الشعوب فى بلادنا جاعت واللصوص ملاعين ودود
ينهبوا ثروات بلادهم كلبشوهم بالجنود
يضربوا وشوشهم بطلقه لجل أسيادهم يهود
حطه يابطه
كل ظالم له نهاية كل ظالم جايله يوم
يخنقه الشعب فى رقبته مش هاياخد عمره صوم
الشعوب لازم تصحصح مش هاتقضى حياتها نوم
ياشعوبنا فى كل دوله يالا فوقوا مالغيوم
حطه يابطه
بوعزيز خلاها ثورة لما صرخ قام وولع
خلى كل الدنيا تعرف إن تونس إن تونس مش هاتخضع
لابن ليلى اللى خلى كل تونسى وحر يركع
وانتوا ياظلام بلادنا ضربتين فى الراس بتوجع
حطه يابطه
عاوزين ثوره ياشعب تحرر كل بلادنا من حراميها
ثوره تحرر مصر بلدنا علشان يرجع كل ماليها
فى التحرير وفى كل محافظه والعملا ياشبابنا دوسوها
دم الشهدا مش هانسيبه صدوا الظلما ودوسوا عليها
حطه يابطه
مصر ياأم ولادك أهم دول علشانك شالوا الهم
راح يفدوكى بالروح والدم يالا يابلدى دوسى الظلم
دوسى المنكر دوسى الغم علشان كل طاغوت يتلم
الطواغيت سرقونا وظلموا أب وأم وأخ وعم
حطه يابطه يادقن القطه حسنى مبارك جاتله زوغوطه
يالا هبى ياجزائر يابلد مليون شهيد
فين شبابك فين رجالك فين كتايب بوحريد
فين قبايلك فين عشايرك يصنعوا الفجر الجديد
مصر أم الدنيا قامت والتوانسه قلوب حديد
حطه يابطه يادقن القطه حسنى مبارك جاتله زوغوطه
الشعوب الحرة لازم يوم تفوق وتقول كفاية
شفت مصر وشفت تونس سطروا مليون حكاية
الشباب الحر صرخ قال ياظالم لك نهاية
يالا إمشى سيب بلادنا وبوعزيز كان البداية
حطه يابطه يادقن القطه حسنى مبارك جاتله زوغوطه
التوانسه جابولنا شعلة نورت أرض الكنانه
حتى ليبيا جالها نورها من سنين عاشوا فى إهانة
والعقيد مجنون وسيفه مدمن الكاس واللبانه
مش هايفنوا شعب ليبيا زنجه زنجه عالخيانة
حطه يابطه يادقن القطه حسنى مبارك جاتله زوغوطه
أرض مغربنا الأبية ليه تخافى مالشهادة
الشهيد فى الجنة عايش كل أوقاته فى سعادة
وانت ياجزاير ياغالية كل تاريخك ريادة
نفسى أوطانى تصحصح لجل ماتعود السيادة
حطه يابطه يادقن القطه حسنى مبارك جاتله زوغوطه
شعر
أشرف على العرينى
مصر العربية - المحلة الكبرى كفرحجازى
